സക്കീർ തബല വായിക്കുകയാണ്. പതിഞ്ഞ കാലൊച്ചകളിൽ … മേഘഗർജ്ജനത്തിന്റെ രൗദ്രതയിലുയർന്ന്
ഇലകളുടെ മർമ്മരത്തിലൊടുങ്ങുന്നു.
നൊടിയിട നിലക്കുന്ന നാദം. ബോധപ്രവാഹത്തിലൊരു വിള്ളൽ. കൈവിരലുകളുടെ നടരാജനടനം;
കുറേ പട്ടാളക്കാർ മാർച്ച് ചെയ്ത് കടന്നുപോവുന്നു.
ഡക്കയും കുറ്റിയും യുദ്ധക്കളമാവുന്നു. തോറ്റവരുടെ പലായനം തബലവായിച്ചെടുക്കുന്നു.
ദുഃഖത്തിന്റെ കടലിരമ്പുന്നു.
സാരംഗിയിലൂടെ കരയുന്നത് വിധവകളാണ്.
സാരംഗിയുടെ നേർത്ത തേങ്ങൽ തബലയിൽ ഹൃദയമിടിപ്പുകളാവുന്നു.
ചടുലമാവുന്നു വിരലുകൾ. അഭയാർത്ഥികളുടെ വണ്ടിയാണിപ്പോൾ കടന്നുപോയത്.
താവളം കണ്ട വണ്ടിയുടെ കിതപ്പും തബലവരയ്ക്കുന്നു.
വിജയികൾക്കൊപ്പം സക്കീർ
ഒരു വെടിക്കെട്ടുകാരൻ.
പതയുന്ന വിജയഭേരി.
മുറുകുന്ന ഞരമ്പുകൾ.
വായുവിലാളുന്ന തലമുടി.
പെരുകുന്ന വിരലുകളിൽ
മാത്രയൊപ്പിച്ച് അമിട്ടുകൾ, രേലപ്പെരുക്കങ്ങൾ.
ധും ധും ധ്വനികൾ.
ഇപ്പോൾ തബല സക്കീറിനെ വായിക്കുകയാണ്.
